"Transfer qısa müddətdə oldu. Bu futbolçunu təklif etdilər və bir həftə izlədim. Bir neçə aydır ki, rəsmi oyunlara çıxmırdı". Bu sözləri Sport24.az-a açıqlamasında "Turan Tovuz"un baş məşqçisi Ayxan Abbasov deyib.
Təcrübəli mütəxəssis rəsmi müqavilə imzaladıqları panamalı müdafiəçi Roderik Miller Molina haqda danışaraq, onun tam formada olmadığını gizlətməyib: "Yeni transferimizə bir az vaxt lazımdı. Fasilədə çalışacağıq ki, ondan yararlanaq. Gələcək üçün atılan addımdı. Klubsuz qalmışdı deyə götürdük ki, sınaq müddətini də keçsin. 30 yaşı var, təcrübəli oyunçudu. O, tezliklə məşqlərə qoşulacaq".
Abbasov onu da vurğulayıb ki, cari mövsümün sonunadək yenə də istədikləri klubsuz futbolçu olsa, götürə bilərlər: "Həm də ən əsası, maddi şərtlərə uyğun gəlməlidi. Necə ki Roderikdə belə oldu".
Qeyd edək ki, panamalı müdafiəçi ilə 3 ay + 1 il müddətində rəsmi müqavilə bağlanıb. Mövsümün sonunda onun çıxışı məşqçilər korpusunu razı salarsa, müqavilənin növbəti 1 illik hissəsi qüvvəyə minəcək. Panamanın “San Fransisko” klubunun yetirməsi olan Roderik Miller karyerası ərzində Meksikanın “Merida”, Kolumbiyanın “Atletiko”, Portuqaliyanın “Feyrense”, Qazaxıstanın “Okjetpes”, Perunun “Karlos Stein”, İraqın “Al Kuva” və “Al Mina” klublarının formasını geyinib. 30 yaşlı müdafiəçi Panamanın əsas millisində 30 oyun keçirib və 1 qol vurub.
