"Milliyə dəvət aldığım üçün çox şadam. Hər bir futbolçu millidə oynamaq istəyər. Təbii ki, futbolçunun oynayıb-oynamamağı baş məşqçidən asılıdır və buna hörmətlə yanaşırıq. Əsas olan oynamağım yox, milli komandanın nəticəsidir". Bu sözləri Sport24.az-ın Qəbələyə ezam olunmuş əməkdaşına açıqlamasında milli komandamızın və "Qəbələ"nin qapıçısı Səlahət Ağayev deyib.
AVRO-2024-ün seçmə mərhələsi çərçivəsində Bakıda təlim-məşq toplanışı keçirəcək Azərbaycan millisinin heyətinə çağrılan Ağayev yaxşı tanıdığı gənc həmkarı Yusif İmanovdan söz açıb: "Əlimizdən gələnin ən yaxşısını edib nəticə qazanmaq istəyirik. Yusiflə "Sabah"da da birgə olmuşuq. Gənc olmasına baxmayaraq, yaxşı perspektivi var. Bir daha deyirəm ki, hər şey baş məşqçidən asılıdır və ona hörmətlə yanaşmalıyıq. Əsas odur ki, hər şey milli komanda üçün yaxşı olsun. Yusif olsun, Amin olsun fərqi yoxdu - yolları açıq olsun. Mən də gənc olanda Kamran Ağayev cəzalı olduğu üçün Berti Foqts Finlandiya yığmasına qarşı oyunda qapıya məni qoydu. Əsas mən yox, milli komandanın nəticəsidir".
Qeyd edək ki, milli komanda AVRO-2024-ün seçmə mərhələsi çərçivəsində martın 24-də səfərdə Avstriya, 27-də isə İsveç yığması ilə qarşılaşacaq.
MEHMAN SÜLEYMANOV, Qəbələ
