Cari çempionata çox yaxşı başlayan, ilk məğlubiyyətlərini keçən turda alan "Zirə"ylə "Sumqayıt"la milliylə əlaqədar ikihəftəlik fasilədən sonra olan VI turu açırdılar. Bu dəfə də ən azı birinin xal itkisi qaçılmaz idi. Bunun "Sumqayıt" olacağını proqnozlaşdıra bilərdik. Çünki hər halda, rəqibi lider idi, üstəlik, onun meydanında oynayırdı. Amma 10-cu dəqiqədən sonra tam fərqli proqnoz gündəmə gəldi. Çünki Rəşad Sadıqovun komandası meydada 10 nəfərlə qaldı. İtaliyalı yarımmüdafiəçi Pyer Zebili açıq ayaqla Rövlan Muradova qarşı kobudluğu baş hakim Kamranbəy Rəhimov tərəfindən birbaşa qırmızı vərəqəylə qiymətləndirildi. Meydan sahibləri üçün bu ağır cəza və referinin VAR-a müraciət etməməsi gərginliyi artırdı. Həmin matçda isə VAR-da ən yaxşı hakimimiz olan Əliyar Ağayev otururdu və o da müdaxillə etməməklə qərarı dəstəklədiyini göstərdi.
Bundan 16 dəqiqə sonra isə baş hakim 2-ci dəfə "qırmızı" üçün əlini cibinə atdı. Bu dəfə cəzalanan artıq qonaqlar idi. Özü də futbolçusu yox, baş məşqçisi. Belə ki, Samir Abasov hakimin qərarına etiraz etdiyi üçün ardıcıl 2 sarı vərəqə alaraq tribunalara göndərildi.
Təbii ki, azlıqda qalan "Zirə" böyük qüvvəylə müdafiə olunaraq daha çox əks-hücumlara ümid etməli olurdu. Əlbəttə, "qartallar" ilk növbədə qapısının toxunulmazlığını fikirləşərək 1 xalı da qənaətbəxş saya bilərdilər. 80 dəqiqədə say azlığında duruş gətirmək üçün həm fiziki, həm taktiki hazırlıq vacib idi. "Zirə" intizamlı oyundan qopmayaraq müdafiədə etibarlı çıxış etməyi bacardı. Komadanın bu yay transfer etdiyi portuqaliyalı qapıçısı Tiaqo Silva da həmin gün ən yaxşılardan idi. O, ilk növbədə qapı xəttində etibarlı idi. İlk hissədə Rövlan Muradovun baş zərbəsinə yaxşı reaksiya göstərən əcnəbi kiper matçın sonunda super reaksiya göstərdi. Həmin epizodda Rövlan başla ötürməsindən sonra Dmitrias Çantakias sanki ayaqüstə yuxuladı və "Sumqayıt"ın israillisi Roi Kehat 2 cəhdən topu tora göndərə bilmədi.
Yeri gəlmişkən, adətən 90 dəqiqə oynayan, matçdan əvvəl "Zirə"də 100-cü oyun keçirməsi münasibətilə klub prezidenti tərəfindən forma hədiyyə olunan Çantakiasın bu dəfə ehtiyatda qalması diqqət çəkdi. Əvəzində yay transferi Stefan Aka ilk dəfə start heyətdə meydana çıxaraq 90 dəqiqə oynadı. Sadıqovun digər maraqlı seçimi əvəzedici heyətə göndərdiyi İlki Muradovu qaytararaq birbaşa əsas heyətdə yer verməsi idi. Həm Aka, həm də Muradov (o da əvəz olunmadı-müəllif.) matçı yaxşı keçirdilər və qələbədə pay sahibi oldular.
Bəli, yekun nəticə məhz "Zirə"nin qələbəsi oldu. Demək olar bütün matçı azlıqda keçirən komandanın qələbə qazanması ilk baxışndan təəccüblü görünür. Amma zirəlilər 10 nəfərlə qalsa belə, rəqibinə qolu necə vurmaq lazım olduğu göstərdi. Özü də müdafiəçiləri. Cari çempionatda artıq neçənci dəfədi "qartallar"ı arxa xətt oyunçuları sevindirir. "Kəpəz"lə Zirədəki görüşdə olduğu kimi, qolu cinah müdafiəçiləri təşkil etdilər. Sadəcə, bu dəfə Qismət Alıyev məhsuldar ötürmə müəllifi olmaqla Məqsəd İsayevə borcunu qaytardı. "Zirə"nin sol cinah müdafiəçisi topu saxlamadan qapıya göndərməklə baxımlı qola imza atdı. Bu yay "Zirə"dən "Sumqayıt"a qayıdan təcrübəli qpaıçı Mehdi Cənnətov yaxın məsafədən endirilən güclü zərbəni dəf etməkdə aciz idi.
Meydan sahibləri uzatma dəqiələrində 2-ci qolu vurmağa da nail oldu. Lakin VAR-ın müdaxiləsindən sonra aşkar qayda pozuntusu olduğu qeydə alındı. Orda "Zirə"nin futbolçusu İssa Cibrilanın əllə oynadığını biz tribunadakılar gördüyümüz halda, hakimlər briqadasının bunu görməməsi təəssüf doğurur. Hər halda, matçın hakim-inspektoru AFFA-nı Hakimlər Komitəsinin sədri Barış Şimşəyin olduğunu nəzərə alsaq, türkiyəli keçmiş hakimin azərbaycanlı həmkarları ilə müzakirə etməyə yetərincə epizodu olacaq.
Beləliklə, 90 dəqiqə gərgin və maraqlı keçən görüşün yekununda "Zirə" 5-ci qələbəsini qazanaraq həm liderliyini möhkəmləndirdi, həm də "Sumqayıt" ardıcıl 2-ci turda məğlubiyyət yaşadı.
MEHMAN SÜLEYMANOV
