Azərbaycan Premyer Liqasının XXXV turu Tovuzda cari mövsüm baş tutan son oyun oldu. Ayxan Abbasovun necə kompromissiz bir məşqçi olduğunu hər kəs bilir. "Səbail"ə isə elitada qalmaq uğrunda bu görüşün nə qədər böyük əhəmiyyət kəsb etməsi haqda danışmağa dəyməz. Elə bu səbəbdən Tovuz ab-havasını 1 gün əvvəldən dadmağa qərara almışdım...
Qərb təmsilçisinin ənənəvi qonaqpərvərliyi barədə geniş danışmağa ehtiyac yoxdu. Tanıdı-tanımadı, hamı səni qonaq çağırır, ürəyinin bir parçasını vermək istəyir. Tovuz belə Tovuzdu. əziz oxucu.
Kapitanın "talançılığı"
Ümumiyyətlə isə, " Huner Group"un "Turan"ı çiyinlərinə almasından sonra komandaya güvən xeyli artıb. Bunu azarkeşlərin coşqusundan da sezmək olar, kassadan alınan buletlərdən də. Ancaq söhbət ki, "Huner Group"dan düşdü, büdcənin necə "talan edilməsi"nə də toxunaq. Klubun bazasında bir göyçək pişik məskunlaşıb. "Turan"ın kapitanı Şəhriyar Əliyevi görər-görməz məstanın gözünə işıq gəlir. Səhər dadlı qaymaqla qidalanan "pələngin kiçik bacısı", naharda da Şəhriyarı tapmağı bacarmışdı...
Oyun gününün səhər saatları. Turnir cədvəlindəki mövqe meydan sahiblərinin futbolçularının gərginlik içində olmamasını şərtləndirirdi. Əlbəttə ki, eyni sözləri paytaxt təmsilçisi haqda demək olmur. Yox-yox, Şahin Diniyevin komandasını oyun saatında yalnız stadionda görmüşdüm. Ancaq az əvvəl yazdıqlarıma da heç bir şübhəm yoxdu ki, "gəmiçilər" gərgin idi.
Tovuzun "tək ayaqqabı dükanı"ndan "Tahirin kafesi"nədək
Günorta saatlarında həmkarım Mirağa Mirzəyevə səhər saatlarındakı "kəşfim" - ayaqqabımın cırılması problemini həll etmək üçün yerli mağazalara baş çəkməyi təklif etdim. Rastımıza çıxan elə ilk mağaza sahibi Tovuzda yalnız onun ayaqqabı satdığını sübuta yetirməyə çalışdı. "Təxribata uymayan" azərbaycanlı jurnalistlərin qismətində üz tutduğu bazar yolundakı "Tahirin kafesi"ndə dadlı təamlardan dadmaq nəsib oldu. Bundan öncə isə... Sanki Sovetlər dönəminə düşmüşdük. Aldığım ayaqqabının qiyməti 34 manat 50 qəpik idi. O dövrlərdə məhsulların qiymətlərində qəpiklər də əlavə olunardı. Hə, yolunuz Tovuza düşsə, "Tahirin kafesi"nə mütləq baş çəkin, peşman olmazsınız.
Bir gündə "iki yağış"
...Rəvan Həmzəzadənin start fiti ilə "Turan" fırtına kimi əsməyə başladı. Qonaqlar belə starta sanki hazır deyildi. "Hücum yağışı"nın məntiqi sonluğu olaraq "baza pişiyinin şəxsi aşpazı" Şəhriyar Əliyev fərqləndi. Qoldan sonra da Ayxan Abbasovun komandası daha dominant futbol nümayiş etdirsə də, daha çox qol epizodu yaratsa da, fasiləyədək tablodakı rəqəmlər dəyişikliksiz qaldı. Lakin 2-ci hissənin də əvvəli Şahin Diniyevin yetirmələri üçün "soyuq duş"la yadda qaldı: bu dəfə tovuzluların baş məşqçisinin adaşı - Quseynov fərqləndi.
Diniyevin "Əhmədləri"
Nəzərə alsaq ki, paralel keçən "Şamaxı" - "Qəbələ" matçında hesab açılmamışdı, "Səbail" səfərdən xalsız ayrılacağı təqdirdə, son turda evdə "Şamaxı"nı yalnız məğlub etməklə son pillədən qurtula bilərdi. Bax, elə bu səbəbdən Diniyev məşhur filmdə Zülümovun "bütün Əhmədləri yığdım ki, məsələni birdəfəlik həll edim" məsəlindən faydalanaraq,q ixtiyarında olan bütün hücumçuları döyüşə atdı. Doğrudu, həmin vaxt fərq minimuma enmişdi - Franko Mazurek "Turan"ın müdafiədəki səhlənkarlığından istifadə etmişdi. Ancaq bütün hallarda, məhz Mirabdulla Abbasov, Ruslan Hacıyev və Qoba Zakpanın oyuna daxil olmasından sonra qonaqlar aşkar üstünlüyə sahib oldu. Ancaq bununla yanaşı, Ayxan Abbasovun futbolçularına "avtobus qurun" tapşırığı vermədiyini də qeyd edək. Turnir cədvəlindəki mövqe bu cür rahatlığı təmin edirdi. Nəhayət, Həmzəzadənin əsas vaxta əlavə etdiyi 3-cü dəqiqədə Zakpa bərabərlik qolunu vurdu. Bundan sonra isə portuqaliyalı "xilaskar" daha gərgin situasiyaya səbəb olması ilə diqqət çəkdi. Ancaq etdiyi hərəkəti incələyəndə aydın olur ki, adam uğursuz oturan alt paltarını dartıb düzəldir və daha sonra növbəti komanda yoldaşından təbriki qəbul edir. Şamaxı təmsilçisinin son turda Zakpanın meydana çıxmaması üçün etdiyi cəhd isə idman prinsiplərinə ziddir. Şahin Diniyev matçsonrası mətbuat konfransında Premyer Liqa sonuncusunun elitanı tərk etməsinin idman prinsiplərinə zidd olduğunu iddia edirdi. Xeyr, cənab Diniyev, mövsümün əvvəlindən bu qərar bəlli idi və sonda da 10-cu yeri tutan komanda aşağı divozona düşməlidi. İdman prinsipinin həqiqətən pozulması isə "Şamaxı"nın Zakpanı zərərsizləşdirmək cəhdidir!
Tovuzda daha bir heç-heçə
Cari işlərimiz gec bitdiyindən daha bir gecə qonaqpərvər Tovuzda qaldıq. Bu dəfə çay qırağında yerləşən "Su səsi"ndə yorğunluğa qalib gəlmək istədik. Yolda həmkarım Rəşad Qasımovun restorana yollanarkən "yəqin ki, sən Bakıdan Tovuza gəlib ayaqqabı alan ilk adamsan" sataşmasını həzm etməli oldum. Nə yaxşı ki, əyləşdiyimiz məkanda "hesab bərabərləşdi": içəri daxil olarkən həmkarımın şalvarı diz tərəfdən qapıdan çıxan mismara ilişərək cırıldı. O ki qaldı "Su səsi"nə... nə özümə, nə də bu sətirləri oxuyan heç kəsə həmin məkana getməyi arzu etmərəm. Masaya gələn təamlar içərisində yeganə bəyəndiyimiz alça oldu. İndi təsəvvür edin ki, sifariş verdiyimiz yeməklər hansı keyfiyyətdə idi. Ancaq heç bir halda Tovuz qonaqpərvərliyi barədə mənfi rəy formalaşmadığını da xüsusi qeyd edərdim.
Beləcə, Tovuzda başlanan yazı Goranın girəcəyində tamamlanır. Bozqurd Etibarı, müstəqillik dönəmində düşmənlə müharibədə bir addım belə geri çəkilməyən qəhrəman qardaşlarımızı yetişdirən torpağa isə hələ çox baş çəkəcəm... Allah qismət eləsə.
CEYHUN ƏLİYEV
