"Millidə keçirilən hər dəqiqə bütün futbolçuların aktivinə müsbət planda yazılır. Milli komanda bir brenddi. Orda əsas heyətdə oynamaq insanda futbola olan sevgini daha da artırır". Bu fikirləri Sport24.az-a açıqlamasında Azərbaycan milli komandasının futbolçusu Coşqun Diniyev deyib.
Millimizin son 2 matçında əsas heyətdə yer alan 28 yaşlı mərkəz yarımmüdafiəçisi Belçika ilə rəsmi matçda məğlubiyyətə gətirib çıxaran səhvini belə şərh edib: "Bəli, həmin epizoddan sonra qapımızda qol oldu. Amma bu cür səhvlərdən heç kəs sığortalanmayıb. Talesizlikdən həmin zərbə sonda kuryoz şəkildə qol oldu. Epizoda tutulub çox qalmaq istəmirəm. Oyundan sonra dəfələrlə analiz elədim. İndi o zamana qayıtsaydım, topu sadəcə, qabağa vurmaqdan başqa bir yol olduğunu düşünmürəm. Gərək kor-koranə uzaqlaşdırardım....Lakin epizod ani saniyələr içində baş verdiyi üçün təxmin edə bilmədim".
Coşqun italiyalı baş məşqçi Canni de Byazi ilə həmin matçdan sonrakı söhbətindən söz açıb: "Həmin gün çox fikirli olduğumu görüb mənə dəstək oldu ki, buna görə ona minnətdaram. Qarşıdakı mata hazırlaşmağımı tapşırdı. Bu üzdən İordaniya ilə yoldaşlıq görüşündə də əsas heyətdə şans verəcəyi mənim üçün gözlənilən idi. Üç gün ərzində iki oyuna çıxacaqdıq. Buna güc baxımından, fiziki planda hazır olduğumu bilirdim və baş məşqçimizin güvəndiyi heyətdə olmaq xoş oldu".
Bu mövsümdən legioner həyatı yaşayaraq Türkiyənin I Liqa təmsilçisi "Ümraniyespor"un futbolçusu olan Diniyev millimizin gələcək perspektivini belə dəyərləndirib: "İstər heyətdən kənarda, istərdə də daxilində olduğum zaman oyun planında artım olduğunu görürdüm. Bizim kimi Top səviyyədə olmayan millilərdə hər bir oyuna gərək maksimum istək diqqət və məsuliyyət olsun. Ki, bu zaman istənilən nəticə üçün savaşa bilərik".
MEHMAN SÜLEYMANOV
