"Bavariya"nın qapıçısı Manuel Noyer Bundesliqa tarixində ən çox oyun keçirən qapıçılar arasında ikinci pilləyə yüksəlib. Sport24.az xəbər verir ki, Almaniya çempionatının 12-ci turunda Münhen təmsilçisinin "Sankt-Pauli" ilə matçı Manuel Noyerin liqada 534-cü oyunu olub.
Bu göstərici sayəsində futbolçu vaxtilə "Borussiya Dortmund" və "Ştutqart"ın şərəfini qorumuş Ayke İmmelin nəticəsini təkrarlayıb.
Qapıçılar arasında Bundesliqada lider 557 oyunla Oliver Kandır.
Qeyd edək ki, 2011-ci ildən "Bavariya"da çıxış edən Noyer bu müddət ərzində 12 dəfə Almaniya çempionu, 5 dəfə ölkə kubokunun və 8 dəfə Super kubokun qalibi olub. O, həmçinin ikiqat Çempionlar Liqası qalibidir.
