Naxçıvan Futbol Federasiyasının və Azərbaycan Futzal Federasiyasının prezidenti Zaur Axundovun Futbolxeber.az saytına danışıb. Sport24.az həmin müsahibəni təqdim edir.
- Bu günlərdə 19 yaşadək futzalçılardan ibarət Azərbaycan millisi tarixində ilk dəfə olaraq Avropa çempionatının əsas mərhələsinə vəsiqə qazandı. Bu komandanın artıq gələcək üçün formalaşdığını söyləmək olar?
- İndidən bu barədə danışmaq tezdir. Açığı, millimizin yer aldığı qrupdakı rəqiblər elə də güclü deyildilər. Amma istənilən halda nəticə var. Komandanı mən də təbrik elədim. Bir qədər zamana ehtiyac var. Təbii ki, uzun müddət nəzərdə tutmuram. Həm federasiya, həm də AFFA tərəfindən komandaya dəstək olur. Çalışırıq ki, bu oyunçuların böyük hissəsi yaxın gələcəkdə əsas millinin üzvlərinə çevrilsinlər. Fürsətdən istifadə edib bir daha komandanı təbrik edirəm.
- Əsas milli barədə hansı fikirdəsiniz? Komanda seçmə mərhələ 3 oyundan sonra 2 xal toplayıb...
- Bilirsiniz ki, hazırda milli komandamız sırf yerli oyunçulardan qurulub. Prioritetimiz gənclərdir. Çalışırıq ki, U-19-un üzvləri qarşıdakı 1-2 il ərzində əsas millinin oyunçularına çevrilsinlər. Bunun üzərində məşqçilər də çalışır. Millinin inkişafı üçün güclü çempionat və beynəlxalq təcrübəyə ehtiyac var. Əsas odur ki, iş gedir. AFFA da sağ olsun ki, bizə lazımi dəstəyi göstərir.
- Millinin baş məşqçisi Vitali Borisovun işindən razısınız, yoxsa?..
- Vitali Borisov əlindən gələni edir. Düzdür, təcrübə öz sözünü deyir. Kənardan görünürdü ki, Yunanıstanla son oyunda müəyyən məşqçi səhvləri oldu. Amma bu, hər məşqçinin başına gələ bilər. O, futzalçı karyerasını yeni başa vurub. Ciddi narazılığım yoxdur.
- İlin əvvəlində "Araz-Naxçıvan"ın baş məşqçi postuna Yevgeni Kukseviç gətirildi. Nəzərə alsaq ki, Naxçıvan klubu son illər millinin bazası olub, rusiyalı məşqçi ilə bağlı hansı planlar var?
- Milli ilə bağlı hazırda hər hansı plan yoxdur. "Araz-Naxçıvan" onunla 5 ay + 1 il müddətinə müqavilə imzalayıb. Kukseviç Rusiyada kifayət qədər tanınmış məşqçidir. 2 gün əvvəl "Neftçi" ilə debüt oyununda da komanda böyük hesablı qələbə qazandı. Lakin onun dəqiq işinə mayda qiymət vermək düzgün olar.
- Keçək böyük futbola. "Araz-Naxçıvan" mövsümə əla start versə də, sanki son turlar qeyri-stabil təsir bağışlayır. Düzdür, oyun baxımından geriləmə olmasa da, nəticələr ideal deyil...
- Mən həmişə tabloya baxıram. Komanda güclü də oynaya bilər, xeyli qol epizodu da yarada bilər, lakin əsas yekun nəticədir. Necə deyərlər, tarixdə nəticə qalır. Xatırlayırsınızsa, ötən il də "Araz-Naxçıvan" qış fasiləsinə qədər yuxarı pillələrdə olsa da, sonradan komandada eniş yaşandı. Lakin o, başqa dönəm idi. Naxçıvan Futbol Federasiyasının prezidenti kimi komanda ilə görüşdüm, danışdım. İradlarımı bildirdim. Birinci dövrədən sonra komandada hər hansı dəyişiklik olmayıb. Düzdür, bəzi futbolçular zədəlidir. Lakin onların yerinə heç də zəif olmayan futbolçular meydana çıxır. İnanıram ki, komanda səhvlərdən nəticə çıxaracaq. Məsələ odur ki, son "Kəpəz"lə oyunda, yaxud əvvəlki matçların bəzilərində komandada boşluq gördüm. Əgər hansısa futbolçu meydana arxayın çıxırsa, düşünürsə ki, bu oyunda rahat qələbə olacaq, yanılır. İdmanda beə səhvlər olmaz. Burada əsas yük məşqçilər korpusunun üzərinə düşür. Mən, yaxud klub prezidenti Ramin Axundov 10-15 dəqiqə danışıb gedirik. Məşqçilər isə daim komandanın, futbolçuların yanındadırlar. Sona 14 tur qalıb. İnanıram ki, son səhvlərdən nəticə çıxarılacaq.
- Hazırda "Araz-Naxçıvan"ın hədəfi nədir: ikinci yerdə qalmaq, yoxsa yerdən asılı olmayaraq avrokuboklara yollanmaq?
- Əsas məqsəd avrokuboklara yollanmaqdır. İkinci, yaxud üçüncü yeri tutmaq ciddi mənada fərq etmir. Komanda mövsümün ilk hissəsini çox yaxşı keçirdi. Bu şansı əldən vermək olmaz.
- Bəs kubok?
- Təbii ki, kubokda da iddiamız davam edir. Ümumiyyətlə, hər oyun vacibdir. İstər kubok olsun, istər çempionat, hər görüşə ciddi yanaşmaq lazımdır. Kubokda 1/4 finalın ilk oyununda "Zirə"yə qalib gəldik, lakin bir neçə gün sonra "Kəpəz"lə matçda xal itirdik. Mən demirəm Gəncə klubu zəifdir. Azər Bağırovun "Kəpəz"dəki işi görünür. Son oyundan sonra mən də onu təbrik etdim. Dedim sağ ol ki, belə komanda yığmısan, bu cür oyun göstərirsiniz. "Kəpəz"in büdcəsi çox olmasa da, Azər Bağırovun dəsti-xətti görsənir.
- Yeni mövsümdən etibarən Premyer Liqada 12 kollektiv mübarizə aparacaq. Komanda sayının artırılmasına münasibətiniz necədir?
- Təbii ki, komanda sayının artırılması müsbət haldır. Ümidvaram ki, Premyer Liqanın yeni iştirakçıları region komandaları olacaq. Düzdür, format tam bilinmir. Lakin futbol tək Bakı və Abşeronu yox, bütün Azərbaycanı əhatə eləməlidir. Regionlarda çox istedadlar var. Onları üzə çıxarmaq lazımdır. Komanda sayının artırılmasını dəstəkləyirəm. AFFA prezidenti Rövşən Nəcəf də sağ olsun ki, bu ideyanı irəli sürüb.
- Bəs legioner limitinin ləğv olunması barədə qərarı necə qarşıladınız?
- Təki futbolumuza xeyirli olsun. Lakin hansı klubun maddi vəziyyəti imkan verirsə, gedib lap 17 legioner gətirəcək. Hər şey maliyyədən asılıdır. Onsuz da idman elə maliyyənin üzərində qurulub.
- "Araz-Naxçıvan"ın bu baxımdan strategiyası necə olacaq? Komandada 17 legioner görə bilərik?
- Xeyr, o qədər yox. İlk növbədə xahiş edəcəm ki, strategiyada Naxçıvan futboluna da yer verilsin. Bilirsiniz ki, Naxçıvan əhalisinin sayı yarım milyona yaxınlaşır. Orada da futbola kifayət qədər maraq var. Buna görə orada da akademiyaya, uşaq futboluna diqqət yetirilməlidir. Tezliklə Naxçıvanda daxili çempionat start götürəcək. Eləcə də futzal birinciliyi təşkil olunacaq. Naxçıvanda futbola maraq böyükdür. Hətta mənə "Araz-Naxçıvan"ın doğma meydanda oynamaması ilə bağlı iradlar bildirilir. Yadınızdadırsa, komanda birinci liqada mübarizə aparanda hər ev oyununda 7-8 min azarkeş olurdu.
- Sizə elə gəlmir ki, legioner limitinin ləğvi yerli futbolçulara mənfi təsir göstərəcək?
- Oyunçu ilk növbədə üzərində işləməlidir. Limitin ləğv olunmasına görə yerli futbolçular əl-qollarını aşağı salmalı deyillər. Özlərini göstərməlidirlər ki, sabah yenə meydanda 3-4 yerli futbolçu olsun. Hər şey insanın özündən asılıdır. Hər birimiz istərik ki, futbolçularımız yüksək səviyyəli xarici klublarda forma geysinlər. Amma son 10-15 ildə demək olar heç bir futbolçumuz xarici klubda möhkəmlənə bilməyib. Bəlkə gələcəkdə mümkün oldu. Gürcülərə, qazaxlara, özbəklərə baxın. Biz də istərdik ki, oyunçularımız o cür klublarda çıxış etsin. Amma bunun üçün formalaşmalıdırlar. Üstəlik, nəzərə almaq lazımdır ki, 11 legioner gəlib millimizdə oynamayacaq. Mən həmişə demişəm, Azərbaycanın bayrağını qaldıran klub deyil, millidir. Azərbaycan futbolu klubla 10 faiz tanınır, milli ilə 90 faiz. Heç kimin haqqına girmək istəmirəm. Hər kəsin öz fikri var. Mən də düşünürəm ki, əsas milli komandadır. Hazırda Millətlər Liqasında D Liqasına düşmüşük. İndi yenidən, pillə-pillə yuxarı qalmalıyıq. Milli komandaya təkan vermək lazımdır. Bu gün komanda Fernandu Santuşa tapşırılıb. Lap tutaq ki, onu göndərib yerinə Mourinyonu gətirdik. Əsas meydana çıxan 11 futbolçu can qoymalıdır. Keçən dəfəki sözümə görə məndən inciyənlər oldu. Amma mən sözümün üstündə yenə dururam - futbolçu millidə can qoymalıdır. Çünki əsas milli komandadır. Siz jurnalistsiniz, mən də Naxçıvan Futbol Federiyasının prezidenti. Hər birimizin ürəyi milli üçün daha çox yanır. Klub səviyyəsində "Qarabağ" uğurlar qazanır, hamımız buna sevinirik. Amma istərdik ki, milli komandamız da adından söz etdirsin. Azərbaycan futbolunun əsas göstəricisi milli komandadır. Santuşa dəstək olmaq, oyunçulara motivasiya vermək lazımdır. Nə çatışmır? Bu gün AFFA rəhbərliyi millinin uğur qazanması üçün əlindən gələni edir. Meydana Santuş çıxmır ki.
- "Araz-Naxçıvan" hələ də Bakıda oynayır. Bilirik ki, bu, tək sizdən asılı olan məsələ deyil. Amma hədəf olaraq siz seçilirsiniz və tənqid edilirsiniz...
- Tənqid edirlər, sağ olsunlar, amma stadionu mən tikməmişəm. Stadiona baxış keçirilib. Mən özüm də müəyyən şirkətlərlə danışmışam. Qazonu dəyişmək, işıqlandırma sistemini yeniləmək lazımdır. Geyinib-soyunma otaqları yüksək səviyyədədir. Danışdığımız şirkətlər 3 ay vaxt istəyiblər. Amma dediyiniz kimi, tək məndən asılı olan məsələ deyil. Bu yaxınlarda İdman və Gənclər Nazirliyi də stadiona baxış keçirib. Artıq görüləcək işləri planı hazırdır. Qərar verilməli və maliyyə ayrılmalıdır ki, stadion hazır vəziyyətə gətirilsin.
