Misli Premyer Liqasının XX turunun qapanış matçı "Bakcell Arena"da keçiriləcək. Bu görüşdə "Neftçi" və "Zirə" komandaları üz-üzə gələcəklər. Sport24.az sarı vərəqə limitində olan futbolçularla bağlı turun son yazısını təqdim edir.
Bu mövzuda ev sahibi "Neftçi"nin heyətində iki futbolçunun adını çəkmək mümkündü. Belə ki, I, VII və X turlarda "sarı" ilə cəzalandırılmış Fərid Yusifli və XVI, XVIII və XIX turlarda cəzalanan israilli Ataa Caber limitin astanasındadır. Hər iki mərkəz yarımmüdafiəçisi növbəti sarı vərəqə sayəsində XXI turda "Sumqayıt"la evdə keçiriləcək görüşü tribunadan izləməli olacaqlar. Sadəcə, məsələ odadı ki, Fərid zədəli olduğundan, qarşıdakı görüşün iştirakçısı olmayacaq.
Rəşad Sadıqovun rəhbərlik etdiyi komandada isə vəziyyətin daha rahat olduğunu yazmaq olar. Ona görə ki, "Zirə"nin heyətində cəmi bir oyunçu sarı vərəqə limitinə yaxınlaşıb - o da qapıçı Anar Nəzirov. 38 yaşlı qolkiper V, VI və IX turlarda alınan vərəqələr səbəbindən limitin bir addımlığında dayanıb. Nəzərovun növbəti "sarı"sı onu XXI turda evdə "Qəbələ" ilə keçiriləcək görüşdə iştirakdan məhrum edəcək.
Qeyd edək ki, bu gün keçiriləcək "Neftçi" - "Zirə" matçı saat 17:30-da başlayacaq.
