Bu gün Avropa çempionatının seçmə mərhələsi çərçivəsində İspaniyanın Mursiya şəhərində ukraynalı həmyaşıdlarının qonağı olacaq U-21 yığmamızda legioner həyatı yaşayan futbolçular az da olsa var. Onlardan biri olan, bu ili Latviyanın "Dauqavpils" klubunda keçirən cinah yarımmüdafiəçisi Ramil Nəsirli Sport24.az-a müsahibəsində həm milli, həm də gələcək klub karyerası haqda danışıb.
- Ukrayna ilə rəsmi matçöncəsi "Dalğa Arena"da 1:0 hesabıyla qalib gəldiyiniz Latviya ilə yoxlama matçı sizə hansı motivasiya verdi?
- Çox yaxşı oyun oldu. Bu qələbədən sonra Ukrayna ilə səfər matçına da yüksək əhval-ruhiyyədə çıxacağıq. Ümid edirəm ki, İspaniyadan qələbə ilə geri dönəcəyik.
- Qrup lideri ilə oyunda hansı nəticəyə ümid edirsiniz?
- Ən yaxşı oyunumuzu göstərməyə çalışacağıq. Qələbə də qazanmaq istəyirik. Məncə, heç-heçə də yaxşı nəticədi. Çünki rəqib qrupda 1-ci yerdə gedir. Ukrayna İngiltərəni 3:2 hesabı ilə məğlub edib. İstəyirik ki, Bakıya yaxşı nəticə ilə qayıdaq.
- Latviya yığmasının heyətində "Dauqavpils"də çıxış edən komanda yoldaşların var idi. Onlara qarşı oynamaq necə idi?
- Bəli, iki nəfər komanda yoldaşım idi. Ümumiyyətlə, Latviya millisində çıxış edən 7-8 nəfəri tanıyırdım. Onlara qarşı oynamışam. Komanda yoldaşlarıma da məsləhətlərimi vermişdim.
- Matçdan öncə latviyalılarla oyun haqda zarafatlaşmışdınız?
- Klubda olanda danışırdıq. Demişdilər ki, sizi udacağıq. Mən də deyirdim ki, şansınız yoxdur, biz qələbə qazanacağıq. (gülür). Mesajımı da göndərdim.
- Latviyada mövsüm bitdi. Bundan sonra necə olacaq?
- "Neftçi"yə qayıdıram. Çünki bu klubla 6 aylıq müqaviləm var. Bundan sonra necə olacağı hələ bilinmir.
- Latviyada çıxış etdiyin son mövsümü necə dəyərləndirirsən?
- Mənim üçün çox faydalı oldu. Hər halda, 36 oyunun 27-də əsas heyətdə oynadım.
- "Dauqavpils" səni saxlamaq istəyir?
- Bəli. Yəqin ki, həm onlarla, həm də "Neftçi" ilə danışıqlar olacaq.
- "Dauqavpils" səni birdəfəlik transfer etmək istəyir? 6 aylıq müqavilən qaldığına görə bu variant "Neftçi"yə də sərf edər...
- Latviyada oynadığım üçün yəqin ki, ordan başqa təkliflər də olacaq. Alınsa, dəyərləndirəcəm. Birdəfəlik transfer ola bilər.
- "Dauqavpils"də qalmaq istəyirsən, yoxsa Latviyanın başqa klubuna keçmək?
- Başqa, daha iddialı, yüksək yerdə gedən klubda oynamaq istəyirəm.
- Bəs, başqa ölkələrdən təklif var?
- Menecerimlə hələ ki, bu barədə danışmamışam. Millinin oyunlarından sonra daha ətraflı danışacağıq.
- Son vaxtlar adın Azərbaycan klubları ilə hallanır...
- Bəli, mən də o xəbərləri oxumuşam. Dəqiq nəsə deyə bilməyəcəm. Real təklif hələ ki yoxdu.
- Latviya çempionatının səviyyəsi sənə inkişaf etmək üçün imkan yaradır, yoxsa Azərbaycanda oynamaq istəyirsən?
- Bəli, imkan yaradır. Amma təbii ki, doğma klubum olan "Neftçi"də oynamaq istəyərəm. Həm də ona görə ki, Azərbaycan çempionatı Latviyadan üstündü.
- Bir şeyi də unutmayaq ki, Neftçi"də rəqabət, xüsusilə yarımmüdafiə xəttində güclüdü...
- Elədi. Amma çalışacam ki, rəqabətdə yaxşı nəticə əldə edim.
-"Neftçi"nin rumıniyalı baş məşqçisi Adrian Mutu sənin haqda nə düşünür? Maraqlıdı, bu haqda qulağına bir şeylər çatıb?
- Açığı, yox. Yəqin ki, oyunlarıma baxıb. Millinin oyunlarından sonra daha ətraflı söhbət edəcəyik.
MEHMAN SÜLEYMANOV
