Azərbaycan bu gün İsveçrədə keçirilən 21 yaşadək futbolçulardan ibarət yığma komandaların (U-21) Avropa çempionatının (AÇ-2025) seçmə mərhələsinin püşkatma mərasimində 2 nəfərlə təmsil olunub. Sport24.az xəbər verir ki, bunlar U-21 yığmamızın baş məşqçisi Samir Əliyevlə AFFA-nın aşağı yaş qruplarından ibarət milli komandaların kuratoru Nəriman Axundov olublar.
Bu haqda saytımıza Əliyev məlumat verib. O, rəqib yığmaların nümayəndələri ilə görüşdə təqvimi müzakirə etdiklərini vurğulayıb ki, artıq UEFA bunu təsdiqləyərək açıqlayıb. Əliyev bu axşam Vətənə dönəcəklərini də sözlərinə əlavə edib.
Xatırladaq ki, 21 yaşlılarımız F qrupunda Lüksemburq, Şimali İrlandiya, Serbiya, Ukrayna və İngiltərə yığması ilə mübarizə aparacaq. Azərbaycan seçmə mərhələyə bu ilin sentyabrın 12-də Serbiya ilə səfər matçıyla stat götürəcək. Qitə çempionatının final mərhələsi 2025-ci ildə Slovakiyada keçiriləcək.
