TOP 10

Priştina faciəsinin kökü

V BUCAQ
Müəllif: Ceyhun Əliyev
UEFA Mİllətlər Liqası yığmamız üçün acınacaqlı sonluqla nəticələndi. Ötən gecə Kosovo yığması həmvətənlərinə əsl bayram yaşatdı. Final fiti səslənməmişdən şəhərdə atəşfəşanlığa start verildi. Bu da başadüşüləndi: tarixində 2-ci dəfə rəsmi seçmə turnirdə iştirak edən yığma qrup qalibi olmağı bacardı...

 

Oyunun başlamasına 2 saata yaxın vaxt qalırdı. Paytaxtda elə bir yağış yağırdı ki, “tut ucundan göyə çıx”. Buna baxmayaraq, yerli azarkeşlər tribunaları ağzına kimi doldurdular. Matç ərzində də bir an belə susmayan kosovolu azarkeşlər milli futbolçuları üçün əsl “12-ci oyunçu” olmağı bacardılar. Yerli medianın ölkəmizə qarşı apardığı təbliğat isə dövlət himnimiz səslənərkən fitə basılmasına səbəb oldu. Doğrudu, elə həmin media mənsublarının böyük əksəriyyəti “axı, sizin yığma Bakıda oynayanda himniniz azərbaycanlılar tərəfindən fitə basılmamışdı” ifadəsini eşidər-eşitməz konfrans zalını tərk edərək acizliyini ortaya qoydu. Lakin bu, matçdan sonra yaşanacaqdı. 

 

Stadionun qonaq komandanın dövlət atributuna qarşı bu cür aqressiv davranışı futbolçularımızı daha da qıcıqlandırmalı idi. Ancaq təəssüf ki, acizkəranə şəkildə bunun əksinə şahidlik etməli olduq. Dominant tərəf Bernar Şallandın yetirmələri idi ki, artıq 2-ci dəqiqədən bunu üzərimizdə hiss etdik. 

 

Futbolçulardan kimisə xüsusi olaraq “məşər ayağı”na çəkməyəcəyik. Səbəb sadədi. Heç kim barədə “yaxşı oynadı” sözünü işlədə bilmirik. Bəli, bir istisna var idi. Mirabdulla Abbasovu nəzərdə tuturuq. Ancaq burda da obyektiv bir məqama toxunaq: “Neftçi”nin forvardı oyuna daxil olanda iş işdən keçmişdi və 3:0 hesabı ilə irəlidə olan meydan sahiblərinin eyni emosionallıqla oynadıqlarını söyləsək ədalətsizlik olar. Lakin bütün hallarda 23 yaşlı hücumçu Farer adalarına qarşı ev oyununda olduğu kimi, yenə də xoş təsir bağışladı.

 

Oyundan sonra keçirilən mətbuat konfransında bu sətirlərin müəllifi Qurban Qurbanova “Bizi, millimizi nə gözləyir” sualını ünvanladım. Təcrübəli mütəxəssisin cavabının onurğa sütunu belə oldu: “Məncə, bu suala müəyyən zamandan sonra cavab vermək olar”. 

 

Mənə görə isə... Gələcəyimiz parlaq görünmür. Söhbət heç də Kosovodan alınan acı məğlubiyyətdən getmir. Veteran futbolçu, uzun illər ölkənin ən tanınmış şərhçisi olmuş Çingiz İsmayılov SSRİ çempionatında “Neftçi”nin növbəti məğlubiyyətini şərh edərkən belə bir cümlə işlətmişdi: “Nə etmək olar, qablarında olan budu”. Bax, əziz oxucu, bizim futbolçuların da qablarında olan budu, budu, budu!

 

Kimi dindirirsən, “uşaq futbolu” deyir. Təbii, uşaq futbolu olduqca önəmli sahədi. Ancaq uşaq futbolu yaxın 10-15 ildən sonra nəticə verməyə başlayacaqsa, bizə bu gün irəliləyiş lazımdı. Həmin irəliləyiş yolu da təbii rəqabətdən keçir. Bizdə isə...

 

Nə qədər ki, legioner limiti qalacaq yerli futbolçular klublara öz şərtlərini diqtə edəcəklər. Əgər bir legioner mövsümünə 80 min (şərti olaraq) istəyirsə və eyni mövqedə oynayan yerli futbolçu daha zəif olsa da, 100-120 min tələb edirsə, niyə klub bu qədər artıq xərcə düşməlidi? Nə qədər ki, 1996-cı il və daha gənc yaşlı 1 futbolçunun oynaması şərti qalacaq gənc oyunçular karyeralarını yox, pulu üstün tutacaqlar. Bu limitlər ləğv olmasa, yerli futbolçular əsl rəqabətlə üzləşməyəcək, ölkə xaricindən gələn təkliflərə ağız büzməkdə davam edəcəklər, gənclər məşqdən sonra maşınlarına minib əylənməyə tələsəcəklər. Bax, onda təbii rəqabət yaranacaq. Nəticədə, futbolçularımızın ustalıq səviyyəsi də, milli də güclənəcək.

 

CEYHUN ƏLİYEV, Bakı-Priştina-Bakı

 

P.S. Kosovo – Azərbaycan matçının start fitindən öncə Priştina səfərinə həsr olunmuş yazının böyük hissəsi hazır idi. Lakin dünən yaşananlardan sonra yazı istiqaməti tam fərqli xəttə yönəldi.
 

 
09 Dekabr 2018
B.eÇ.aÇC.aCŞB