TOP 10

Ramilin qaçışı...

HƏQİQƏT ANI
Müəllif: Kamal Rza
Ramil Quliyev... Atletika üzrə dünya və Avropa çempionu. Azərbaycanda doğulub, amma Türkiyə bayrağı altında yarışır. Hər qələbəsindən sonra meydanda hər iki ölkənin bayrağı ilə qələbə dövrəsi vurur. Bu, onun doğulub boya-başa çatdığı Vətəninə sevgisinin təzahürüdür. Amma burada onun qədrini bilmədilər, istedadına güvənmədilər.

 

Ramil obyektiv və subyektiv səbəblərdən 2011-ci ildə Azərbaycanı tərk etdi. Hələ o vaxt böyük potensial vəd edirdi. Dünya cempionatında 200 metr məsafə qaçışda yeddinci olmusdu. Amma buradan qaçmalı oldu. 

 

Səbəb? 

 

İdman təssərrüfatını idarə edənlərin onun üçün şərait yaratmaması. Halbuki onlar hər çıxışlarında Azərbaycanın idman ölkəsi olduğunu söyləyir, idmanın inkişaf etdiyini vurgulayırlar. Hətta MOK vitse-prezidenti və AGİ naziri Ramili fərari adlandırmaqdan belə çəkinmədilər. Çünki onlar gənc idmançının böyük uğurlar qazanacağına inanmaq istəmirdilər, inana bilmirdilər. Bu barədə çox deyilib, çox danışılıb. Ramilin hər uğurundan sonra keçmiş məsələlər yenidən qabardılır.


Məqsədim Azərbaycan torpağında yetişən insanların bacarığı barədə yazmaqdır. Görəsən, biz niyə özümüzünkülərə inanmırıq? Onlar üçün şərait yaratmrıq? 

 

Elə götürək çalışdığım sahəni. Uzun illərdir istehsalatda fəaliyyət göstərirəm və dünyanın bir çox ölkələrinin nümayəndələri ilə həmkar olmuşuq: avstraliyali, koreyalı, amerikalı, hindistanlı, fillippinli, italiyalı, polşalı, rumıniyalı, indoneziyalı, almaniyalı, türkiyəli... bu siyahını daha da uzatmaq olar. Əminliklə azərbaycanlıların onlardan geri qalmadığını, hətta bəzi komponentlərdə həmkarlarını üstələdiyinin şahidi olmuşuq. Bu amilə təhsildə, musiqidə, istehsalatda, tibdə, elə Ramilin simasında idmanda şahidlik edirik. Sadəcə, bizə inanmaq, bizə şans vermək lazımdır. Ölkəmizdə Lütfi-Zadə, Fərman Salmanov, Müslüm Maqomayev, Çingiz Abdullayev, Tofiq Bəhramov, Ramil Quliyev kimi fəxr edə biləcəyimiz vətəndaşlarımız çoxdur. Bu siyahıya Reyhan Camalovanı da əlavə etmək olar. Gənc qızın kəşfi bütün dünyaya səs saldı. Onu da Azərbaycandan qaçırmayaq.
 

KAMAL RZA

 
16 Avqust 2018
15 Avqust 2018
B.eÇ.aÇC.aCŞB