TOP 10

Dünya çempionları və biz: "Qara tarix"in iştirakçısından məyus etdiyimiz kapitanadək

TRİBUNA(L)
Müəllif: Mehman Cahandar
Futbol üzrə növbəti dünya çempionatı başa çatdı. Sayca 21-ci olan mundial Fransa yığmasının zəfəriylə yadda qaldı. Didye Deşam baş məşqçisi olduğu milli komanda finalda Xorvatiya yığmasına 4:2 hesabıyla qalib gələrək, tarixində 2-ci dəfə dünya kubokunu başı üzərinə qaldırdı. 

 

Fransızlar qızıl medalı məğlubiyyətsiz qazandılar. Final mərhələsində keçirdiyi 7 oyundan 6-da qalib gələn Didye Deşamın yetirmələri yalnız bir matçda bərabərlik etdilər. Maraqlıdı ki, Danimarkayla qrupun son turunda həmin qolsuz heç-heçə DÇ-2018-də yeganə 0:0 oldu. 

 

Əlbəttə, hər bir ölkənin yığması, o cümlədən Azərbaycan millisi böyük turnirlərin iştirakçısı olaraq uğur qazanmaq istəyir. Ancaq bizə nə dünya, nə də Avropa çempionatının həyəcanını yaşamaq nəsib olub. Hələ ki, son dünya çempionlarının futbolumuza bağlılıqları haqda yazmalı olacağıq. Təbii ki, Fransa millisinin futbolçuları Azərbaycanda legioner həyatı yaşamayıblar. Ancaq buna baxmayaraq, onlar arasında ölkəmizə yolu düşənlər də olub, bizə qarşı oynayanlar da. Bu araşdırma yazımızda ondan bəhs edəcəyik.

 

İlk növbədə onu qeyd edək ki, millimiz 26 illik tarixində Fransa yığmasıyla cəmi 2 dəfə qarşılaşıb. Bu, debüt seçmə mərhələmizdə - AVRO-1996-da olub. Fransızların baş məşqçisi onda futbolçu kimi millimizə qarşı oynayıb. Özü də futbolumuz üçün "qara tarix"də - 1995-ci ilin sentyabrın 6-da keçirilən "Oser faciəsi"ndə. Bəli, Fransanın Azərbaycana 10:0 hesabı ilə qalib gələrək, millimizə ən böyükhesablı məğlubiyyəti yaşatdığı həmin matçda Deşam 90 dəqiqə meydanda olub. Ancaq qapımıza qol vuranlar arasında Didye olmayıb. Millimizin Fransa yığması ilə ilk matçı bundan 1 il öncə Trabzonda olsa da, 0:2 hesabıyla uduzduğumuz həmin qarşılaşmada Deşam heyətdə olmayıb.

 

Deşamın Rusiyaya apardığı 23 nəfərlik heyətdə bir neçə futbolçu var ki, bizimlə yolları kəsişib. Dünya çempionlarının kapitanı Uqo Loris çıxış etdiyi "Tottenhem"in heyətində "Qarabağ"la Avropa Liqasının qrup mərhələsində hər 2 matçda qapıda əvəzedilmədən olub. Özü də Uqo Londondakı görüşün artıq 7-ci dəqiqəsində şok yaşayıb. Belə ki, millimizin də üzvü olan yarımmüdafiəçi Riçard Almeyda penaltidən Lorisin qapısına yol taparaq hesabı açıb. Bundan sonra 3 qol vuran "Tottenhem" 3:1 hesablı əzmkar qələbə qazanıb. Təcrübəli qapıçı Tofiq Bəhramov adına Respublika stadionunda 1:0 hesabıyla qalib gəldikləri matçda isə qapısını toxunulmaz saxlaya bilib.

 

İngiltərə klublarıyla avrokuboklarda digər duelimiz də "Qarabağ"la qrup mərhələsində olub. Bu, ötən mövsümdə Çempionlar Liqasındadı (ÇL) ki, onda da rəqib London təmsilçisi - "Çelsi" idi. Azərbaycan çempionu həmin matçlarda 10 cavabsız qolla uduzub - "Stemford Bric"də 0:6, Bakı Olimpiya Stadionunda 0:4. Göründüyü kimi, ingilislərə qitəmiqyaslı turnirlərdə yeganə qolu məhz Lorisə vurmuşuq. Uqonun millidəki komanda yoldaşı Nqolo Kante indi də şərəfini qoruduğu "Çelsi"nin heyətində "Qarabağ"la matçlarda start heyətində yer alıb. O, Londonda 63-cü, Bakıda 75-ci dəqiqədə əvəzlənib. 

 

Həmin ÇL-in qrup mərhələsində digər fransalı dünya çempionları da "Qarabağ"a rəqib olub. Bunlar "Atletiko"nun oyunçuları - müdafiəçi Luka Ernandeslə hücumçu Antuan Qrizmanndı. Luka millisində sol cinah oyunçusu kimi əvəzolunmaz isim olsa da, klubunda əsas heyət üzvü deyil. Təsadüfi deyil ki, Ernandes "Qarabağ"la ötən ilin payızındakı matçlarda ehtiyatda qalıb. Əvəzində Qrizmann millisində olduğu kimi, "Atletiko"nun da əsas qol ümidlərindəndi. Sadəcə, Antuan 180 dəqiqə ərzində bizə qol vura bilməməsiylə diqqət çəkib. 

 

Fransa yığmasının daha bir futbolçusu da bizə qarşı oynayıb və bu da, "Qarabağ"la qrup mərhələsində olub. Söhbət yarımmüdafiəçi Tomas Lemardan gedir. O da hazırda "Atletiko"nun üzvü olsa da, hazırkı yay fasiləsində bu kluba keçib. Lemar 2015-ci ildə "Monako"nun futbolçusu kimi Avropa Liqasının qrup mərhələsində Qurban Qurbanovun komandasıyla görüşüb. Ancaq yalnız Fransada 1:0 hesabıyla qalib gəldikləri oyunda. Əsas heyətdə meydana çıxan Lemar 79-cu dəqiqədə əvəzlənib. Tomas Tofiq Bəhramov adına Respublika stadionunda 1:1 hesabıyla nəticələnən qarşılaşmada heyətdə olmayıb. 

 

Hazırda "Ştutqart"da oynayan sağ cinah müdafiəçisi Benjamen Pavar 2016-cı ildə "Lill"in heyətində Avropa Liqasının III təsnifat mərhələsində "Qəbələ"yə rəqib olub. Ancaq onun adı matçların rotokoluna daxil edilməyib. Bununla belə, Pavar Bakıya gələn heyətdə heyətdə yer alıb. 

 

Onu da qeyd edək ki, Fransa millisinin yarımmüdafiəçisi Stiven Nzonzi də bizə potensial rəqibdi. Axı məlum olduğu kimi,  ucaboylu futbolçunin çıxış etdiyi "Sevilya" "Neftçi" Avropa Liqasının I təsnifat mərhələsində Macarıstanın "Uypeşt" klubunu keçəcəyi halda onunla qarşılaşacaq. Sadəcə, klublar dünya çempionatında iştirak edən futbolçularına istirahət verdiyindən, Stivenin bizimlə qarşılaşmalarda iştirak edəcəyi gözlənilmir. 

 

Sonda Fransa millisinin DÇ-2018-də çempion heyətini diqqətinizə çatdırırıq:

 

Qapıçılar: Uqo Loris ("Tottenhem", İngiltərə), Stiv Mandanda ("Olimpik", Marsel), Alfons Areola (PSJ);


Müdafiəçilər: Rafael Varan ("Real”, İspaniya), Adil Rami ("Olimpik", Marsel), Cibril Sidibe ("Monako"), Samuel Umtiti ("Barselona", İspaniya), Benjamen Mendi ("Mançester Siti", İngiltərə), Benjamen Pavar ("Ştuttqart", Almaniya), Luka Ernandes ("Atletiko”, Madrid, İspaniya), Presnel Kimpembe (PSJ);


Yarımmüdafiəçilər: Blez Matuidi ("Yuventus", İtaliya), Pol Poqba ("Mançester Yunayted", İngiltərə), Nqolo Kante ("Çelsi", İngiltərə), Toma Lemar ("Monako"), Koranten Tolisso ("Bavariya", Almania), Stiven Nzonzi ("Sevilya", İspaniya);


Hücumçular: Olivye Jiru ("Çelsi", İngiltərə), Antuan Qrizmann ("Atletiko", Madrid, İspaniya), Kilian Mbappe (PSJ), Usman Dembele ("Barselona", İspaniya), Nabil Fekir ("Olimpik", Lion), Florian Toven ("Olimpik", Marsel).
 

 

MEHMAN SÜLEYMANOV

 
16 Avqust 2018
15 Avqust 2018
B.eÇ.aÇC.aCŞB