TOP 10

İtkin düşən İsayev... indi də “Neftçi”yə naz edir

Futbol
Tarix: 2019-08-13 15:40

Aleksey İsayev. Ötən mövsümün tapıntısı kimi səciyyələndirilən “Sumqayıt”ın pleymekeri qış fasiləsindən sonra arxa plana çəkilməyə başladı. Bəziləri bunu rəqib komandaların İsayevə daha çox diqqət yetirməsi ilə əlaqələndirdi. Ancaq bu geriləmə də 24 yaşlı futbolçunun milli düşərgəsinə dəvət almasına əngəl olmadı. Hərçənd, İsayev Slovakiya və Macarıstana qarşı oyunların heç birində start heyətə düşə bilmədi. Elə macarlarla qarşılaşmanın son 10 dəqiqəsində millimizdə debüt etmə şansına da biganə yanaşdı və bununla da xasiyyətində ciddi problem olduğunu göstərdi.

 

...Yeni mövsümün startına sayılı günlər qalıb. “Sumqayıt”da isə İsayevi görən yoxdu. Daha doğrusu futbolçunun arada ölkəmizə baş çəkdiyi bildirilib. O, həqiqətən də Bakıya da baş çəkib, Sumqayıta da. Ancaq bu insan fəxri prezident deyil ki, kefi istəyəndən istəyənə komandaya baş çəksin. 

 

“Gənclik şəhəri” təmsilçisinin mövsümə hazırlıq prosesində iştirak etməyən şıltaq İsayev başqa komandaya keçmək istədiyini bildirib. Heç “kimyaçılar” da bu keçidin əleyhinə deyillər. Ancaq məsələ burasındadır ki, 24 yaşa çatmış bu insan övladı hələ də anlamır ki, müqaviləylə kluba məxsussansa, keçidin üçün kompensasiya ödənilməlidir. O, gah Rusiyaya üz tutmaq istəyib, gah Portuqaliyaya. Rəsmi təklif gəldikdə isə konkret qərar verməkdən boyun qaçırıb.

 

İndi Aleksey çıxılmaz vəziyyətdədir. Çünki “Sumqayıt”a qayıtsa belə, onu iki aydı düşərgəsində olmalı olduğu “Sumqayıt” tərəfindən böyük məbləğdə cərimə gözləyir. Bu cərimədən canını qurtarmaq üçün o, özünə təcili surətdə yeni klub tapmalıdır. Nəzərə alsaq ki, artıq əksər ölkələrdə çempionatlar start götürib, bizdə də artıq bu həftə başlayır, Alekseyin vəziyyəti acınacaqlıdır. Hətta deyərdik gələcək karyerası ciddi şübhə altındadır.

 

Doğrudu, futbolçunun üzünə günəş doğa bilər. Çünki bütün hoqqalarına rəğmən, “Neftçi” İsayevi rənglərinə qatmaq istəyir. Ən maraqlısı budur ki, bu qədər başı daşdan daşa dəyən yarımmüdafiəçi “ağ-qaralar”a da müsbət cavab vermir. Hərçənd, necə deyərlər, “alan razı, satan razı”dı. Avroliqanın qrupuna düşməyi hədəfləyən “Neftçi”yə iki cəbhədə döyüşmək üçün əlavə qüvvə mütləq lazımdı. “Sumqayıt” isə xarakterində ciddi problemlər olan İsayevdən həm gəlir əldə etmək, həm də canını qurtarmaq istəyir. Amma yayda “papağını günə verən” və heç bir hazırlıq keçməyən Alyoşa bu sövdələşməyə də naz edir. 

 

Hadisələrin gedişatı onu göstərir ki, hələ ötən mövsümün əvvəlində ünvanına ən xoş sözlər işlətdiyimiz, milli üçün yaxın gələcəyin lideri olacağını iddia etdiyimiz bir ulduz parlamadan sönmək üzrədir.

 

 

 

CEYHUN ƏLİYEV
 

11 Noyabr 2019
10 Noyabr 2019
B.eÇ.aÇC.aCŞB