TOP 10
BİZİM MƏTBƏX

Elxan Məmmədov: “Kloppa tövsiyə etmək istəyərdik ki...”

Futbol
Tarix: 2019-05-11 17:00

“Liverpul”un baş məşqçisi Yurgen Kloppun “Avropa Liqasının finalının Bakıda keçməsi gülməlidi. Bilmirəm, bu qərarı verənlər səhər nə yeyirlər” deməsi əlbəttə ki, ölkəmizdə birmənalı qarşılana bilməzdi. Deyilənlərlə bağlı AFFA-nın baş katibi Elxan Məmmədov Sport24.az-a açıqlama verib. 

 

Assosiasiya rəsmisi alman mütəxəssisin bu cür danışmasını təəccüblə qarşılayıb: “Kloppun sözləri məni sözün heç də yaxşı olmayan mənasında təəccübləndirdi. Onun barədə pozitiv insan kimi fikirləşirdim. Bəli, Klopp çox gözəl nəticələrə nail olmuş böyük futbol mütəxəssisidir. Bununla belə, futbolun coğrafiyasının məhdudlaşdırılması ilə bağlı onun səsləndirdiyi fikirlərlə qəti razı deyiləm. Biz futbol dəyərlərinə hörmətlə yanaşmalıyıq. Futbolun ən vacib dəyərlərindən biri isə onun sərhədlərinin genişləndirilməsi, futbolun qloballaşmasıdır”. 

 

Baş katib finalın paytaxtımızda keçirilməsinin müsbət tərəflərindən də danışıb: “Avropa artıq çoxdan qitənin qərb hissəsinin sərhədlərindən kənara çıxıb. Əminəm ki, Şərqi Avropada keçirilən beynəlxalq oyunlar, avrokubokların finalları futbolun inkişafına, yeniyetmə və gənclər arasında populyarlığının artmasına müsbət təsir göstərir. Bəzilərinin skeptik yanaşmasına baxmayaraq, biz Rusiayada möhtəşəm şəkildə təşkil olunmuş dünya çempionatının şahidi olduq. Eyni sözləri Kiyevdə keçirilmiş Çempionlar Liqası finalı və ÇL-də 10 il əvvəlki İstanbul finalı barəsində də demək olar”. 

 

Məmmədov Kloppun Madriddə baş tutacaq CL finalı öncəsi qiymətlərin qaldırılmasına dair də fikirlərini bölüşüb: “Bəli, ola bilər ki, Çempionlar Liqası finalı ilə əlaqədar bu il Madriddə qiymətlər qalxıb, amma bu, bazar iqtisadiyyatının kənar təsirləridir və böyük idman tədbirləri ərəfəsində bu cür hallar yaşana bilər. O fikirlə də razıyam ki, Londondan Bakıya avtobusla gəlmək çətindir, amma məsafələr əsl azarkeşlər üçün nə vaxt maneə olub ki?! 

 

Sonda həmsöhbətimiz ritorik sualla da yadda qaldı: “Avropa Liqasının final oyunu üçün tenderdə 3 şəhər iştirak edirdi – İstanbul, Sevilya və Bakı. Digər ölkələrin iştirakına kim mane olurdu ki?!


Əminəm ki, Bakıda böyük futbol bayramı olacaq. Eləcə də, Madriddə də unudulmaz günün yaşanacağına əminəm. Finala gözəl hazırlaşmışıq. Otellərdə hələ də boş yerlər var, mağazalarda və restoranlarda kifayət qədər pivə almaq mümkündür, aviaşirkətlər əlavə çarter reysləri açmağı planlaşdırır. Deməli, indi hər kəsin öz işinə konsentrasiya olmasının əsl zamanıdır.

 

Yurgen Kloppa isə tövsiyə etmək istərdik ki, ölkələri və paytaxtları avrokubokların finallarının keçirilməsi üçün layiqli və layiq olmayanlara bölmək əvəzinə, qlobal futbol dəyərlərinin təbliği ilə məşğul olsun. O, kifayət qədər populyar şəxsdir və fikirlərini bütün dünyada milyonlarla azarkeş izləyir”.
 

19 Oktyabr 2019
18 Oktyabr 2019
‹›
B.eÇ.aÇC.aCŞB