TOP 10
BİZİM MƏTBƏX

“Sabah”ın “təməl daşı”

Futbol
Tarix: 2019-02-12 16:00

Premyer Liqaya hələ bu il çıxdılar. Gəldikləri ilk gündən də cari mövsüm üçün əsas məqsədlərini açıqladılar: “Elitadakı yerimizi qorumaq uğrunda mübarizə aparacağıq”.

 

Alındımı? Bu suala yalnız mövsümün sonunda cavab tapacağıq. Hələliksə, gəlin “alınırmı” sualına cavab axtaraq.

 

Arxada qalan 16 tur “Sabah” üçün enişli-yoxuşlu keçib. Komanda mərhum Səməndər Rzayevin “Bəyin oğurlanması”nda dediyi kimi “gah göyə qalxır, gah yerə enir”. Hə, Hidayət müəllim bunu rejissora xitabən deyir. Ancaq bu, yeni yaradılmış komandaya da şamil oluna bilər. Yeni formalaşmış, Premyer Liqada debüt edən komandadan bundan savayı nə gözləmək olardı ki? Bəli, istisnalar olur. Məsələn, “Zirə” debüt mövsümündəcə gümüş medallara sahib çıxmışdı. Ancaq az öncə qeyd etdiyimiz kimi, bu, istisnadır. 

 

“Sabah”ın bu günü obyektiv səbəbdən qeyri-sabit qrafik cızmaqla keçsə də, sabahı planlı formatın qurulması əsasında pozitiv proqnozlara əsas verir. Hələ mövsümün əvvəlində Cavid İmamverdiyev “Sumqayıt”dan ayrıldığına görə tənqid olunurdusa, bu gün debütantın çıxışı istedadlı pleymekerin heç də səhvə yol vermədiyini göstərir. Elə qış fasiləsində Təmkin Xəlilzadə kimi universal cinah oyunçusunun keçidi də“Sabah”ın sabaha hesablanmış addımı kimi səciyyələndirilməlidi. Çünki komanda cari mövsümün yekunlarına əsasən tutacağı yerdən asılı olmayaraq avrokuboklarda iştirak edə bilməyəcək. Ancaq bu, o anlama gəlmir ki, “Sabah” mövsümü boşa verməli və yalnız növbəti çempionat öncəsi formalaşmalıdır. Əksinə, komandanın onurğa sütunu məhz indidən formalaşmalıdır. Çünki heyət mütləq oturuşmalıdı.

 

“Sabah” tək təcrubəlilərdən formalaşmış, bu günə hesablanmış fəlsəfəylə yaşamır. Eltun Turabovun 22,  Elgün Nəbiyevin 23, Elşən Abdullayev, Məqsəd İsayev və Coşqun Diniyevin 25 yaşları var. Bu da komandanın yaxın illər üçün yerli kadr baxımından qıtlıqla üzləşməyəcəyindən xəbər verir.

 

Əlbəttə, mövsüm başa çatdıqdan sonra heyətdə müəyyən dəyişikliklər olacaq, kimlərsə gedəcək, kimlərsə gələcək. Ancaq ən əsas budur ki, “təməl daşı” möhkəm qoyulub.
 

18 Iyul 2019
17 Iyul 2019
‹›
B.eÇ.aÇC.aCŞB