TOP 10
BİZİM MƏTBƏX

Mircavadov qrupumuzda 2-ci yerə favorit görmür: "Millimizə saymazyanalıq olacaq ki, bundan istifadə etmək lazımdı"

Futbol
Tarix: 2018-12-05 14:00

"Hesab edirəm ki, püşkün nəticəsi bizim üçün normal oldu. Məlum şeydir ki, bir aşkar favorit var, bu da Xorvatiya yığmasıdı. Onlar qrupda bütün komandalardan üstündü. İkinci aşkar güclü yığma isə yoxdu". Bu fikirləri Sport24.az-a açıqlamasında Azərbaycan milli komandasının sabiq baş məşqçisi Ağasəlim Mircavadov bildirib.  

 

Millimizin AVRO-2020-nin seçmə mərhələsindəki püşkünün nəticəsini dəyərləndirən təcrübəli mütəxəssis hesab edir ki, final mərhələsinə vəsiqə verən 2-ci yer uğrunda aşkar favorit yoxdu: "Uels, Slovakiya və Macarıstan Avropanın orta səviyyəli yığmalarıdı. Bunu Millətlər Liqasında da göstərdilər. Bu yığmaların hamısıyla vaxtilə oynamışıq. Fikrimcə, oyun üslubları qalıb. Sadəcə, futbolçular dəyişilib. Gənc oyunçular inkişaf edəndən sonra komandalar nəticə verirlər. Ancaq bu 3 yığmada daimi nəticə olmur. Ara-sıra dünya, Avropa çempionatının final mərhələsinə düşürlər. Yadımdadır ki, Slovakiya millisi 2010-cu ildə tarixində ilk dəfə dünya çempionatına düşmüşdü. Onda baş məşqçisi hazırda Gürcüstan millisini çalışdıran Vladimir Vayss idi. Onun adını daşıyan oğlu da yığmada oynayır. Çalışacaqlar, istəkli olacaqlar. Ancaq hamısının oyun üslubunu bilirik və hamısıyla oynamaq olar. Söhbət oyundan gedir. Bunun üçün hərfətəfli hazır olmaq lazımdı".

 

Təqvimə də nəzər salan Mircavadov 6 komandalı qrupa düşməyimizi arzulayırmış: "Ancaq başqası 5 komandalı qrup istəyə bilər. Aydın məsələdi ki, hər insanın öz fikri var. Sonda 5 komandalı qrupa düşdük. Deməli, elə olacaq ki, 3 gündəki bəzi qoşa matçlardan azad olacağıq. Bu da bizə o mənada xeyirlidi ki, hazırlaşmağa vaxtımız çox olacaq. Keyfiyyətli hazırlaşmaq və oynamaq lazımdı. Birinci məqsədimizi bilməyik ki, millimiz nə qədər hazırdı, hara qədər gedə bilər, sonra iş görmək lazımdı. Bunu isə futbolçuları, rəqibi analiz edəndən sonra həyata keçirməliyik. Belə götürəndə, seçmə mərhələyə az qalıb. Deməli, martadək olan 3 aylıq vaxtdan səmərəli istifadə etməliyik". 

 

İndi daha çox müzakirə olunan məsələ millimizin UEFA Millətlər Liqasındakı uğursuzluqdan sonra daha güclü rəqiblərlə seçmə mərhələdə nəyə ümid etməsidi. 71 yaşlı mütəxəssis buna da toxunub: "Söhbəti yoxdu ki, həmin uğursuzlqdan sonra çox ağır olacaq. Ancaq bizdə belə təsəvvür olmasın ki, Millətlər Liqasında bu qrupdan çıxa bilmədiksə, seçmə mərhələdə nə udacağıq. Məsələyə başqa prizmadan baxmalıyıq. Elə oyunlar olub ki, evdə güclü yığmaları udmuşuq. Elə qarşılaşmalar olur ki, baş məşqçi sözünü deyir, çıxır otaqdan, dayanır qıraqda. Futbolçular yığışır, toplarlanır, çıxıb oynayırlar, qələbə qazanırlar. Belə hallar mənim də baş məşqçi karyeramda çox olub. Deyək ki, təcrübəmiz yoxdu. Yox, elə deyil, maşallah, var. Millisinin əsasını təşkil edən "Qarabağ"ın futbolçularının Avropa Liqası, Çempionlar Liqası qrup mərhələsində oynamaq təcrübələri var. Digər milli üzvlərimizin də beynəlxalq təcrübəsi az deyil".

 

Mircavadov rəqiblərin bizə zəif komanda kimi yuxarıdan aşağı baxmalarıyla razılaşır: "Autsayder olduğumuzdan bizə saymazyanalıq olacaq ki, bundan istifadə etmək lazımdı. Bütün hallarda layiqli oynamalıyıq. İlk olaraq öz oyunumuzu tapmalıyıq ki, hansı stildə oynamalıyıq. Futbol get-gedə daha da inkişaf edir, sürət artır. Baş məşqçi hətta qapıçısından tələb edir ki, əllə, ayaqla 70 metr ötürmə verməlisən. Bir şeyi tələb etmək üçünsə onun üzərində işləməlyik. Bu da klubların məşq prosesinə, futbolçuların hazırlığına gedib çıxır. Bunlar isə bir-birinə zəncirvari bağlı olan şeylərdi".

 

 

MEHMAN SÜLEYMANOV

 

 

15 Dekabr 2018
14 Dekabr 2018
‹›
B.eÇ.aÇC.aCŞB