TOP 10
BİZİM MƏTBƏX

Slavik millidə baş tutmayan debütündən və "Pyast" variantından danışdı: "Avroliqada maksimun nəticəyə oynayacağıq"

Futbol
Tarix: 2018-06-12 10:41

Milli komandamızın son təlim-məşq toplanışına çağırılan yeganə debütant Slavik Alxasov oldu. Ötən mövsüm "Keşlə"də inamlı çıxışıyla yadda qalan 25 yaşlı sol cinah oyunçusu millimizin baş məşqçisi Qurban Qurbanovun da diqqətini çəkdi. Ancaq Slavik yoldaşlıq görüşlərinin hamısında ehtiyatda qaldığından debütü baş tutmadı. Alxasovla həm bu, həm də klub karyerasıyla bağlı məqamlar haqda söhbətləşdik. Təcrübəli futbolçu Sport24.az-a müsahibəsinə ilk dəfə olduğu əsas yığmayla və onun baş məşqçisi haqda təəssüratlarını bildirməklə başlayıb. 

 

- İlk dəfədir milli komandanın düşərgəsində olduğu üçün mənə maraqlı idi. Hesab edirəm ki, təlim-məşq toplanışı mənim üçün yaxşı keçdi. Qurban Qurbanovla fərdi söhbətim olmadı. Onu deyə bilərəm ki, çox ciddi məşqçidi. Nizam-intizamı çox sevir, buna hər zaman üstünlük verir. Elə məşqlərində də hər şey qaydasında olmalıdı. 

 

- Millimizin yeganə debütantı kimi diqqət mərkəzində idin. Ancaq 3 yoldaşlıq görüşünün heç birində meydana çıxmamaqla "siftə"ni reallaşdıra bilmədin. Bunu nəylə əlaqələndirirsən? Ümumiyyətlə, millinin yalnız məşqlərində iştirak etmək səndə ruh düşkünlüyü yaratmadı? 

- Yox. Özümdə heç bir problem görmədim. İstəyərdim ki, mən də oynayım, özümü göstərim. Ancaq bu, baş məşqçinin qərarıdı və buna hörmətlə yanaşıram. Qismət belə imiş, bir oyunda belə meydanda olmadım. Millidə özümlə bağlı heç bir problem olmayıb. Məşqlərimi etmişəm, nizam-intizamım da öz yerində olub. Başqa heç bir səbəb görmürəm, baş məşqçinin qərarının belə olduğunu deyə bilərəm. Buna da hörmətlə yanaşmalıyıq.

 

- Düşünmürsən ki, millinin optimal heyəti artıq formalaşdığından Millətlər Liqasına dəvət olunmaq şansın çox aşağıdı?

- Növbəti təlim-məşq toplanışlarına məni çağırıb-çağırmamaq artıq baş məşqçinin qərarı olacaq. İnşallah, bunu zaman göstərəcək.

 

- Milli komandamızın məsul sınaq öncəsi son yoxlama matçlarırında və öz mövqeyində oynayanların çıxışını necə dəyərləndirərdin? 

- Bu matçların 2-də inamlı qələbə qazandıq. Ancaq Qazaxıstanda 0:3 hesabıyla uduzduq. Hərçənd, matça yaxşı hazırlaşmışdıq. Baş məşqçimiz rəqibin güclü və zəif tərəflərini bizə başa salmışdı. Ancaq oyunda özümüzü göstərə bilmədik. Düzdü, belə məğlubiyyətdən sonra futbolçularda ruh düşkünlüyü olmuşdu. Ancaq toparlandıq və Latviyayla matçda göstərdik ki, bu məğlubiyyət təsadüfi idi. Sol cinahda oynayanların çıxışına gəlincə, buna qiymət verməyim düzgün olmazdı. Həmkarlarımla bağlı baş məşqçi qərar verir. 

 

- Bir az da klub karyeran haqda danışaq. "Keşlə"də qalmağa qərar verdin. Buna əsas səbəb nə oldu?

- "Keşlə"ylə yeni 2 illik müqavilə imzaladım. Növbəti 2 mövsümdə də bu komandanın futbolçusuyam, onun uğurları üçün çalışacağam. "Keşlə" mənim üçün artıq doğmalaşıb, burada özümü yaxşı hiss edirəm. Ona görə də "Keşlə"də çıxışımı davam etdirməyə qərar verdim. Düzdür, başqa təkliflərim də vardı. Ancaq hazırkı klubumda qalmağı üstün tutdum. Danışdıq və razılaşdıq.

 

- Yeni müqavilən 1 yox, 2 illik oldu. Bu, sənin təşəbbüsün oldu, yoxsa klubun?

- Mənim fikrim oldu ki, 2 illik müqavilə imzalayaq. Qarşı tərəf də buna razılaşdı, sağ olsunlar. 

 

- Polşanın "Pyast" klubuna keçmək variantın olduğu deyilirdi. Bu, nə dərəcədə real idi? Real idisə, niyə dəyərləndirmədin?

- Bəli, belə bir təklif olmuşdu. Ancaq yüz faiz olmadığı üçün arxa plana keçdi. Bəzi detallar var idi ki, onda razılığa gələ bilmədik. Başqa təkliflər də olsa da, "Keşlə"də qalmağı üstün tutdum. 

 

- "Keşlə" yay fasiləsində sol cinaha "Sumqayıt"dan tanıdığın Azər Salahlını gətirilib və əsas heyətə düşmək uğrunda rəqabət artır...

- Azər tanıdığım futbolçudu, yaxın dostumuzdu. Qardaş, rəqabət yaxşı şeydi. Bu, inkişafa səbəb olur. İnşallah, "Keşlə"də ikimiz üçün də yaxşı olacaq. 

 

-  Komandanızın Avroliqada şanslarını necə dəyərləndirərsiniz? Qarşıya hansı məqsəd qoyulacaq?

- Maksimum nəticəyə oynayacağıq. Bunun üçün maksimum gücümüzü qoyacağıq. Avroliqada mərhələlər keçmək istəyirik. 

 

 

MEHMAN SÜLEYMANOV

19 Oktyabr 2018
18 Oktyabr 2018
‹›
B.eÇ.aÇC.aCŞB