TOP 10

Məmmədyarov: “Azərbaycan şahmatçılarına qarşı oynaya bilmirəm”

Şahmat
Tarix: 2018-04-26 18:38

Vüqar Həşimovun xatirəsinə həsr olunan Shamkir Chess 2018 superturnirinin 7-ci turunda Azərbaycan şahmatçıları Şəhriyar Məmmədyarovla Teymur Rəcəbov heç-heçə oynayıb. Sport24.az xəbər verir ki, Şəhriyar Məmmədyarov mətbuat konfransında Azərbaycan şahmatçılarına qarşı mübarizə aparmağın çətinliyindən danışıb:

"Teymur Rəcəbovla 1993-cü ildən şahmat oynayırıq. 1993-cü ildə ilk dəfə Rəcəbova qarşı mübarizə aparmışam. O vaxt cəmi 4 ay əvvəl şahmat oynamağa başlamışdım. Təsəvvür edin, 4 ay şahmat öyrəndim, sonra yarışda Rəcəbova qarşı çıxış edirəm. Teymur artıq uşaqlar və yeniyetmələr arasında bir sıra beynəlxalq turnirlərin qalibi, mükafatçısı idi. Yarışda Vüqar Həşimov, Qədir Hüseynov da iştirak edirdi. İndiyə qədər yadımdadı. Ağ fiqurlarla üstünlük qazanmışdım, amma oyunun həlledici məqamında Teymur heç-heçə təklif etdi. Razılaşdıq və partiya bərabərliklə yekunlaşdı. Oyundan sonra hamı Teymurdan heç-heçə oynamağının səbəbini soruşurdu.


Ümumiyyətlə, müxtəlif beynəlxalq turnirlərdə rəqib oluruq. Etiraf edim ki, Azərbaycan şahmatçılarına qarşı oynaya bilmirəm. Bütün gücümlə mübarizə aparmaq alınmır. Millidə komanda yoldaşım, dostum olan şahmatçıya rəqib kimi baxmaq asan deyil. Ona görə beynəlxalq turnirlərdə də azərbaycanlılarla görüşmək istəmirəm”.


Azərbaycan şahmatçısı bəzi həmkarlarının məğlubiyyəti qəbul edə bilmədiyini söyləyib: "Məğlub olsan belə, həvəsdən düşmək olmaz. Gərək növbəti görüşə hazırlaşasan. Çində keçirilən turnirdə ukraynalı şahmatçı Vasili İvançuka qalib gəlmişdim. Partiyadan sonra İvançuk ağlamağa başladı. Göz yaşlarını görəndə çox pis oldum. Onun pərəstişkarları da üzüldü. İvançuk çox duyğusal insandı, ona görə özünü saxlaya bilmədi”.
 

20 May 2018
19 May 2018
B.eÇ.aÇC.aCŞB