Xəbər Lenti

    Kim yatmış, kim oyaq? Hamı yatmış,

    HƏQİQƏT ANIMüəllif: Ceyhun Əliyev
    ...
    Uşaqlıq illərində nənəsinə “Cırtdanın nağılı”nı oxutmayan olub? Əlbəttə, istisnalar olar bilər: ya nənə üzü görməyənlər, ya nənə-babayla ayrı yaşayanlar bu şirin nağılın ahəstə nənə səsi ilə oxunmsını duymayıblar. Duymasalar da məşhur “kim yatmış, kim oyaq” sualından agahdırlar...
    
    Topaz Premyer Liqasının növbəti mövsümünün startına hələ 3 aya yaxın vaxt qalsa da, növbəti mövsümün cizgiləri indidən planlaşdırılmalıdı. Legioner limiti olan bir ölkədə yerli futbolçu qıtlığı daim yaşanacaq. Söhbət klubların iddialarına cavab verən oyunçulardan gedir. Elə bu səbəbdən də ölkə daxilində yeni mövsümün startına ilk baxışdan çox vaxt qalsa da, komandalar indidən əməli işlərə keçməlidi.
    
    Bəs, Premyer Liqa klublarımızın durumu nə yerdədi?
    
    Başlayaq “Qarabağ”dan. Rafael Sabatinin “Kapitan Bladın odisseyası” əsərində Barbados adasına gətirilən bütün qullar əvvəlcə polkovnik Bişopun nəzarətindən keçirdi. Polkovmik ən çox bəyəndiyi qulları aldıqdan sonra digər plantatorlar da seçim imkanı qazanırdı. Futbolçuları qulla müqayisə etmirik, ancaq reallıq budu ki, ardıcıl 4 mövsüm çempionluğu bayram edən “Qarabağ” ölkənin “Bişop”udu - istədiyi yerli oyunçunu ala bilər. Məlum məsələdi ki, ölkə daxilində hegemonluq edən komandada istənilən futbolçu oynamağ arzulayır. Bu səbəbdən də “süvarilər” ilk seçim imkanına sahibdirlər. Elə heyətə nəzər yetirdikdə də görürük ki, Ağdam klubu ölkə daxilində üzdə olan futbolçuların əksəriyyətini bayrağı altına toplaya bilib. Çempion haqda “əsas heyətə düşməyənlərdən komanda yaradıb, adını “Qarabağ-2” qoysan, gümüş medalı qazanar” əbəs yerə deyilmir ki! Bütün qeydləri nəzərə alsaq, Qurban Qurbanovun komandasının daxili bazarda passivliyi başadüşüləndi. 
    
    “Ən aktiv klub” nominasiyası isə şübhəsiz ki, “Sumqayıt”a verilməlidi. Samir Abasov çempionat qurtarar-qurtarmaz bazara fırtına kimi girdi. Tural Axundov, Vüqar Bəybalayev, Cavid İmamverdiyev, Rəşad Eyyubov kimi futbolçuları rənglərinə qatan “Gənclik şəhəri” təmsilçisi Kamal Mirzəyevlə Ramil Həsənovla da ortaq məxrəcə gəldi. Nəzərə alsaq ki, komanda ötənilki heyətin əsas simalarını qoruyub saxlaya bilib (Mirabdulla Abbasovdan başqa), növbəti mövsüm “Sumqayıt” avrokubok zonasına düşmək uğrunda mübarizə aparanlar sırasında olacağını proqnozlaşdıra bilərik. 
    
    Əgər “İnter” məlum transfer qadağasına görə, yalnız ötənilki heyətin qorunması problemləri ilə məşğuldursa, “Qəbələ” və “Zirə”nin passivliyi olduqca narahatedici məqamdı. Axı, hər iki komanda ölkəmizi Avropa Liqasında təmsil edəcək. “Zirə” “axtarırıq” statusu ilə bircə Nicat Qurbanovu tapıb ki, bu da fantastik nailiyyət deyil. “Qəbələ” isə ümumiyyətlə, özünü dincə qoyub. Bu cür yanaşma “qırmızı-qaralar”a olduqca baha başa gələ bilər. Hər halda bir tək İlqar Qurbanovla ortaq məxrəcə gəlməklə iş bitmir.
    
    Belə görünür ki, “Kəpəz” mövsümü ot örtüyünə qurban verir. Hər halda stadionda aparılan işlərin başlanması ilə komandadakı “yarpaq tökümü” üst-üstə düşdü. Tural Axundov, Vüqar Bəybalayev, Orxan Əliyev, Nicat Qurbanov, Dario Federiko kimi futbolçuların gedişi Gəncə təmsilçisi üçün ağrısız ötüşməyə bilməz. Gələnlərin adları isə...
    
    “Neftçi”. Nə deyək? Ölkədə tanınan 50 oyunçu varsa, onun 49-nun adı “ağ-qaralar”la yanaşı hallanıb. Kimi dindirirsən, deyir ki, “mənimlə maraqlanırlar”. Götürək elə Elvin Məmmədovu. Yarımmüdafiəçinin “Neftçi”yə keçməsi artıq rəsmiləşirdi ki, “Qəbələ”nin rənglərinə qovuşmaq ehtimalı yarandı və indi böyük ölçüdə onun “qırmızı-qara” formaya qovuşacağı dəqiqləşib. Elə Ruslan Qurbanovla Rəşad Sadiqov da “Neftçi”yə qayıdanlar siyahısındadı. Ancaq klub hələ ki, “gözlə-gözlə” oynayır. Bunun acı fəsadlarını görmək üçünsə uzaq keçmişə boylanmağa ehtiyac yoxdu.
    
    “Səbail” də nisbətən aktiv klublar sırasındadı. Samir Əliyevin baş məşqçi postuna gəlişindən sonra Murad Ağayevlə Kamal Qurbanov komandaya gətirilib. Ancaq Əliyev və klub başbilənləri başa düşməlidilər ki, “dəmiri isti-isti döyərlər”. Əks halda “Əli aşından da olacaqlar, Vəli aşından da”.
    
    Yekunlaşdıraq. Topaz Premyer Liqasının 8 klubundan birinin (“Qarabağ”) ölkədaxili bazarda aktivliyinə ehtiyac yoxdu, biri isə (“Sumqayıt”) demək olar ki, transfer çalışmalarını yekunlaşdırıb. Qalanları isə... Necə deyərlər, “hamı yatmış, “Sumqayıt” oyaq”.
    
    
Topaz Premyer Liqası
Komanda O Q H M T/F X
Qarabağ 28 18 6 4 46-14 62
Qəbələ 28 14 10 4 48-21 52
İnter 28 11 10 7 39-33 43
Zirə 28 10 9 9 29-26 39
Kəpəz 28 9 9 10 24-27 36
Sumqayıt 28 9 8 11 28-35 35
Neftçi 28 9 2 17 24-45 29
AZAL 27 1 7 20 13-50 10
I Divizion
Komanda O Q H M T/F X
Turan 26 18 7 1 62-11 61
Səbail 26 18 3 5 80-25 57
Ağsu 26 16 5 5 63- 21 53
Qaradağ L. 26 17 1 8 64-31 52
Zaqatala 26 15 4 7 69-31 49
Şəmkir 26 15 3 8 41-20 48
Mil Muğan 26 13 5 8 53-33 44
MOİK 26 10 6 10 47-31 36
Şahdağ 26 8 6 12 36-45 30
Şərurspor 26 7 4 15 36-54 25
Energetik 26 5 5 16 25-86 20
Bakılı 26 3 2 21 30-99 11
Rəvan 26 6 1 19 24-70 10
Göyəzən 26 2 4 20 20-99 10