Xəbər Lenti

    Özü rekordçu, komandası autsayder

    TRİBUNA(L)Müəllif: Mehman Cahandar
    ...
    AZAL 2005-ci ildən fasiləsiz çıxış etdiyi Premyer Liqamızdan yola salınır. Düzdür, “təyyarəçilər”in növbəti mövsümü məhz I Divizionda keçirəcəyini indidən əminliklə söyləyə bilmərik. Çünki aşağı dəstədən güclülər dəstəsinə vəsiqə qazananların orada çıxış etmədiiklərinə son illərdə canlı şahid oluruq. Bu mənada iİk olaraq ağla gələn artıq tarixin yaddaşına köçən “Neftçala”dır ki, bu komanda ardıcıl 2 il I Divizionun qalibi olsa da, AFFA-dan Premyer Liqada iştirakla bağlı lisenziya ala bilmədiyinə görə ora buraxılmadı. Üstəlik, növbəti mövsümdə güclülər dəstəsi təmsilçilərinin sayının artrılması real variant olduğundan, AZAL-ın sonda Topaz Premyer Liqasında saxlanılacağı istisna deyil.
    
    Ancaq məsələni zamanın ixtiyarına buraxaraq bununla işimiz yoxdu. İşimiz olan başqa məsələdi. Məsələ AZAL-da olan elə bir insan barəsindədi ki, komandası autsayder olsa da, özü tam fərqli göstəriciyə - rekorda malikdi. Maraqlı təzaddı. Söhbət “təyyarəçilər”in yarandığı tarixdən – artıq 12 ildir orada çalışan, mətbuat xidmətinin rəhbəri olan Eldəniz Yusifovdan gedir.
    
    Səbəbkar fevralın 28-də 40 illik yubileyi ilə əlaqədar Qol.az saytına müsahibəsində adımı çəkərək, onun rekordu ilə araşdırmama qiymət vermişdi: "Həmkarım Mehman Süleymanovun araşdırmalarına görə, bu sahədə rekordçuyam. Əgər belədirsə, bu çox sevindiricidir".
    
    Eldəniz, həqiqətən də belədi, sən öz sahənin rekordçususan və buna şübhə olmamalıdı. Yusifov AZAL-da ilk gündən çalışan yeganə işçidi. Klubu adını 3 dəfə dəyişərək - “Olimpik”lə başlayıb, ardından “Olimpik-Şüvəlan”, son 7 ildəsə AZAL olsa da - mətbuat xidmətinin rəhbəri dəyişməz olaraq qalır.
    
    Ancaq Eldəniz təkcə AZAL-ın yox, klublardakı həmkarları arasında da rekordçudu. Yəni Premyer Liqanın hazırkı təmsilçləri arasında 12 ildir mətbuat xidmətinə rəhbərlik edən yoxdu. Yusifovdan sonra zaman baxımından “İnter”li Səbuhi Məmmədov gəlir. O, 2006-cı ilin noyabrından bu klubda mətbuat xidmətinə başçılıq edir. Həmin ilin dekabrında isə Nurlan İbrahimov "Qarabağ"da fəaliyyətə başlayıb. Hər ikisi klublarında 10 illik fəaliyyətlərini ötən ilin sonunda qeyd edib.
    
    Sıralamada 4-cü yerdə "Qəbələ"li Anar Hacıyev gəlir ki, o, 2010-cu ilin sonundan, artıq 7-ci ildir bu vəzifədədir. "Sumqayıt" 2011-ci ilin ortasından Premyer Liqada çıxış edir ki, onun mətbuat xidmətinə başçılıq edən Rəşad Məmmədov da həmin vaxtdan iş başındadı.
    
    Nəhayət, son 3 mətbuat xidməti rəhbəri 2015-ci ildən postlarındandı. Sadəcə, onları bir-birindən zaman ayırır. "Zirə"nin Premyer Liqada oynayacağı 2005-ci ilin mayında dəqiqləşdi ki, Elman Himayətoğlu həmin vaxtdan bu klubda mətbuat sahəsinə cavabdehdi. "Kəpəz"in güclülər dəstəsinə qayıdışı da həmin zaman rəsmiləşdi ki, bundan 1 ay sonra – 2015-ci ilin iyunundan Azad Mustafayev kluba mətbuat xidməti rəhbəri təyin olundu. Mehman Rəsulov isə 2015-ci ilin sentyabrından "Neftçi"nin mətbuat xidmətinə başçılıq edir. O, rəhbərliyi altında çalışdığı Gündüz Abbaszadənin "ağ-qaralar"dan gedərək televiziya sahəsinə qayıdışından - "CBC Sport"a gəlişindən sonra hazırkı vəzifəsinə təyin olundu.
    
    AZAL bu 12 ildə yalnız 1 dəfə mükafatçı – 2008-ci ildə çempionatımızın gümüş medalçısı olduğundan Yusifovda bu sarıdan kasadçılıqdı. Əvəzində İbrahimovun bu baxımdan bolluqdu. Çünki onun fəaliyyəti “Qarabağ”da nəticə baxımından ən uğuru dövrə təsadüf edib ki, komanda bu müddətdə Qurban Qurbanovun rəhbərliyi altında xeyli mükafat qazanıb. Nurlanın mükafat kolleksiyasında 3 çempionluq, 3 kubok, 1 gümüş, 2 bürünc medal da var. “İnter” kubokun qalibi olmadığından Səbuhidə bu turnirdə titul yox, kubokda uduzan finalçıya verilən 4 gümüş medal var. Məmmədovun titulları 2 çempionluqdu ki, bunlar 2008 və 2010-cu illərdə qazanılıb.
    
    “Qəbələ” hələ ki, titul qazanmadığından Hacıyevin “qızıl”ı yoxdu. Anarın mükafat kolleksiyasında 3 bürünc və kubokun finalçısı kimi 1 gümüş medal var. “Sumqayıt”da ümumiyyətlə, “Kəpəz”də XXI əsrdə medal olmadığından Məmmədovla Mustafayevdə mükafat yoxdu. Eyni sözlər Rəsulova da aiddi. Himayətoğlu isə ötən il “Zirə” ilə tarixində ilk mükafatı - gümüş medalı boynundan asıb.
    
    Yusifov Premyer Liqa təmsilçilərimiz arasında ən yaşlılardan da olsa da, bu planda ilk sırada 1975-ci il təvəllüdlü Məmmədovdu. Eldəniz Səbuhidən 2 yaş kiçikdi. Sonrakı yerlərdə həmyaşıdlar - 1981-ci ildə anadan olan Mustafayevlə Himayətoğlu gəlirlər. Sadəcə, Azad avqustun 25-də, Elman noyabrın 19-da dünyaya gəldiyindən, gəncəli mətbuat katibi həmkarından 3 ay böyükdü. Hacıyev 1983, Rəsulov 1984-cü təvəllüdlüdü. Mətbuat xidmətləri arasında ən gənci isə 1985-ci il təvəllüdlə Rəşaddı. Maraqlıdır ki, mətbuat xidmətləri arasında ən yaşlı da, ən gənc də  Məmmədovlardı və Səbuhi ilə Rəşad arasında düz 10 yaş fərq var.
    
     
Topaz Premyer Liqası
Komanda O Q H M T/F X
Qarabağ 28 18 6 4 46-14 62
Qəbələ 28 14 10 4 48-21 52
İnter 28 11 10 7 39-33 43
Zirə 28 10 9 9 29-26 39
Kəpəz 28 9 9 10 24-27 36
Sumqayıt 28 9 8 11 28-35 35
Neftçi 28 9 2 17 24-45 29
AZAL 27 1 7 20 13-50 10
I Divizion
Komanda O Q H M T/F X
Turan 26 18 7 1 62-11 61
Səbail 26 18 3 5 80-25 57
Ağsu 26 16 5 5 63- 21 53
Qaradağ L. 26 17 1 8 64-31 52
Zaqatala 26 15 4 7 69-31 49
Şəmkir 26 15 3 8 41-20 48
Mil Muğan 26 13 5 8 53-33 44
MOİK 26 10 6 10 47-31 36
Şahdağ 26 8 6 12 36-45 30
Şərurspor 26 7 4 15 36-54 25
Energetik 26 5 5 16 25-86 20
Bakılı 26 3 2 21 30-99 11
Rəvan 26 6 1 19 24-70 10
Göyəzən 26 2 4 20 20-99 10